كتير من الكليات بالجامعات الحكومية، فيها شُعب دراستها باللغة الإنجليزية وكتير من الطلاب مش عارفين الفرق ما بينهم وبين الشعب العربية.
في هذا التقرير «تنسيق الكليات » عملت رصد بأبرز الكليات اللي فيها الشعبة، وهتعرفك عليهم وعن المناهج الدراسية لكل كلية كمان مصاريفهم كام.
أكيد بتسأل نفسك طب أنا هستفاد بإيه لما أدخل شعبة إنجليزي عن العربي؟
الإستفادة بتكون عن طريق تنمية اللغة عندك أكتر وده هيفيدك في سوق العمل بيبقي ليك أولوية بس كل كلية ليها شروطها تعالو بقى نعرف الكليات وشروطها.
شروط تجارة إنجلش
الفرق بين تجارة عربي وتجارة انجليزي أن ده بياخد المواد بالإنجليزي والتاني بالعربي وفي بعض المواد الزيادة في الشعبة الإنجليزية.
وفي فرق برضو في المصاريف، السنة في تجارة إنجلش بـ 10 آلاف جنيه تقريبا وليها شروط خاصة زي:
التقديم لشعبة اللغة الإنجليزية في جامعة القاهرة وطبعا مش هينفع تقدم فيها الا اذا كان جايلك في التنسيق تجارة انتظام.
- تكون جايب 90% على الأقل من درجة اللغة الأنجليزية
-وبيبقي القبول في الآخر حاصل جمع مجموع الدراجات الكلي لكل المواد + درجات اللغة الإنجليزية ودي بتختلف من جامعة لأخرى.
كلية إعلام الشعبة الإنجليزية
دي بتختلف عن إعلام عربي بأنها بتدرس فيها كل المواد بالإنجليزي ماعدا العربي طبعا والتخصص بيبقى من بعد سنة تانية.
في تخصص «عام» ده خاص بشعبة إنجليزي بس اللي هو بتبقي متخصص في الصحافة والعلاقات العامة والإذاعة مع بعض وده مش موجود في الشعبة العربي.
المصاريف بتتراوح من 12 إلى 13 ألف وممكن تقسمهم علي قسطين لو تحب.
وعشان تدخل الشعبة الانجليزي بيعتمد على درجتك في الانجليزي وامتحان انجليزي بتمتحنه في الكلية بيتراوح سعره بين 200 إلى 250 جنيه تقريبا.
حقوق شعبة إنجليزي
في حقوق بندرس أغلب المواد باللغة اللإنجليزية، ومواد بالعربي يعني المنهج حوالي 60% إنجليزي، و40% عربي، ومش لازم تكون خريج مدارس لغات عشان تدخل القسم ده، وأهم حاجة بس تكون دراجتك في الإنجليزي فوق الـ85% ، ودي بتختلف من سنة لسنة، يعني مثلا السنة اللي فاتت خدت اللي جايب 80% فيما فوق فهي مسألة نسبية على حسب التنسيق.
المواد اللي هتدرسها في أول سنة في القسم الإنجليزي هي: (Political systems- Criminilogy & penology Introduction to law- International organizations- Legal terminology Anglo -American law Economics بالإضافة إلى شريعة إسلامية نظرية قانون- قانون دستوري- وفلسفة- وتاريخ قانون).
مصروفاتها تبلغ 5000 جنيه بجانب المصروفات الإدارية، تصل إلى 5700 جنيه.
كلية آثار جامعة القاهرة
كلية الآثار برضو فيها شعبة إنجليزي شروطها بيعتمد علي درجتك في اللغة الإنجليزية وليها مصروفات ممكن تصل 10 الألف جنيه.
كلية الزراعة
في قسم خاص لزراعة بتدرس فيه باللغة الإنجليزية وده بيبقي بمصروفات خاصة.
مصاريفها حسب كل قسم وبتتراوح ما بين 8 إلى 9 الاف جنيه.
كلية اقتصاد وعلوم سياسية
الشعبة الإنجليزية في الكلية هنا بتعتمد على نظام الساعات المعتمدة.
طب يعني نظام ساعات معتمدة؟
تقدر تختار المواعيد وتنظيم الجدول بتاعك بطريقة سهلة فبيسمحلك باختيار المواد اللي عاوز تدرسها وتقوم باختيار الدكاترة بالمواعيد اللي تريحك.
مصاريف الشعبة الإنجليزية والفرنسية كام؟
المصاريف: تشمل مصاريف الكلية حوالي 12 ألف جنيه تزيد سنويا ومقسمة كالأتي:
♠مصاريف نظام الساعات المعتمده بقيمة 350 جنيه في الساعة.. وبيكون المبلغ قيمه الساعة × عدد الساعات المختاره.
♠ يبلغ عدد الساعات في الأربع سنين 141 ساعة.
♠ الحد الأدنى لعدد الساعات فى الترم الواحد 12 ساعه لـ«4 مواد»، وأقصى عدد 18 ساعة «6 مواد».
كلية آداب قسم اللغة الإنجليزية
كلية آداب من الكليات التي يبلغ عدد الأقسام بها حوالي 19 قسم من ضمن أقسامها، قسم اللغة الإنجليزية والقسم ده زي غيره ليه شروط يعني مثلا كلية.
مصاريفها نفس مصاريف الكلية وتبلغ 1000 جنيه
آداب عين شمس شروطها:
أن درجة الانجليزي متقلش عن 90% و كمان يتقبل في الاختبار اللي بيعمله القسم عشان تتقبل والأولية بتكون لمجموع الدرجات الأعلي في الاختبار ده.
ألسن قسم إنجليزي
كلية الألسن فيها حوالي 14 قسم للغات مختلفة، قسم اللغة الإنجليزية بالكلية بيعتمد علي درجات في الإنجليزي كحد أقصي 90 % وممكن تختلف من سنة للتانية.
مصاريفها تتراواح ما بين 1050 إلى 1500 جنيه ويتعامل القسم على أنه قسم من الكلية وليس منفصل عنها.
