بالصور .. شرح خطوات التحويل بين الكليات خطوه بخطوه

 بالصور .. شرح خطوات التحويل بين الكليات خطوه بخطوه 

التحويلات وقتها وطريقتها وايه بيتقبل وايه يترفض وبيتعمل ازاى كله هنا :

يا ريت تقرا الاول

التحويلات لجميع المراحل يوم ااربعاء 1-8 لحد يوم الاتنين 6-8

- انت سجلت الرغبات لقيت عندك في الموقع كليات عليها نطاق ( أ ) وكليات ( ب ) وكليات ( ج )

بعد ظهور نتيجه التنسيق
- جالك كليه خارج نطاق ( أ ) يعني من ( ب ) او ( ج )
هيكون قدامك فرصه انك تحول لمحافظتك نطاق ( أ )
طيب ولو مش عندك اصلا من الكليه دي ف النطاق( أ ) ف انا بقولك انت وحظك لما هتفتح الموقع يا اما تلاقيه مختار لك واحده من ( ب ) تحول لها يا اما هيقولك عفوا كما بالصورة

- ممكن يترفض ؟
اه ممكن يترفض لو انت مش من ضمن العدد اللى الكليه محدداه ، كل كليه بتحدد عدد معين يتقبل وهو 10% من سعه الكليه يعني لو كليه بتاخد 100 يبقي هتاخد 10طلاب من التحويلات ، التحويل من نفس موقع التنسيق هتدخل تسجل رغبه واحده فقط بدل ما كنت بتعمل 60

◘◘ للامانه تحويلات كليات القمه بيبقي فيها صعوبه تتقبل مش كل الجامعات لكن جامعات بعينها زي المنصورة او اسكندريه
بيكون مثلا اصعب كليه ف التحويل هي اسنان وصيدله لان بتكون الكليه عاوزه مثلا 50 تحويل بس وتلاقي مقدم 200 واحد ع تحويل لها المفروض هياخدو الاعلى لكن الكليات دي بيكون تقريبا كل الناس جايبه زي بعضها يعني بص ع تنسيق اسنان تلاقي كل اسنان زي بعضه يجي يلاقوهم 200 وهما عاوزين 50 يقولك لا بقلشهم مش هنقبل حد خالص

◘ اما كليات النظريه تجاره اداب حقوق كله ده بيتقببل لانه بيوديك انتساب ف مفيش اي مشكله للمكان على عكس كليات العمليه بيحتاج لك مكان علشان المعامل

❇ في 4 انواع من التحويلات :

◘ النوع الأول ( تقليل اغتراب مناظر ) بغض النظر عن المجموع تحول لنفس نوع الكليه الى جت لك يعني من طب ل طب او هندسه ل هندسه حتى لو مش جايب درجتها ف محافظتك ، هياخدوا العدد المطلوب حسب المجموع الاعلى بين المحولين ، ولو عندك اكتر من جامعه في نطاق ( أ ) بيكون التحويل للجامعه الاقل في الحد الادني يعني واحده منهم خدت من 90% وواحده من 88% يبقي تحويلك للي خدت من 88% وفي كل الحالات لا يمكنك اختيار الجامعه الموقع بيقول لك هي دي اللى ينفع تحولها بس .

◘ النوع التاني ( تقليل اغتراب غير مناظر ) تحول لكليه مختلفه ف نطاق ( أ ) عندك بشرط جايب مجموعها يعني من طب لصيدله مثلا مش شرط انك جايب مجموعها تتقبل يعني كليات اسنان وطب وصيدله وعلاج الاعداد فيها محدود ميقدرش يقبل كل اللى يبقي محول حتي لو جايب درجتها
لو عندك اكتر من جامعه في ( أ ) تقدر اختار منهم .

بالنسبه لطلاب الانتظام والانتساب
- لو انت جالك انتظام وعاوز تحول انتظام ف محافظتك يشترط عليك تكون جايب اعلى من درجه الانتساب ف الكليه الى تحول لها ، وف حاله لو مجموعك = او اقل من مجموع الانتساب في الكليه اللى محول لها ف انت هتتسجل انتساب
وفي كل الحالات موقع التنسيق بيختار لك الجامعه الى ينفع تحول لها .

◘ في نوع تالت من التحويلات بيترفض قبل ما تعمله وبيترمي ف الزباله ومش بيبصو عليه اسمه ( التماس خارج النطاق الجغرافي ) انك تحول برا محافظتك " بيترفض بيترفض بيترفض " اوعي تجربه الا لو مفييش قدامك الا هو يعني مثلا الكليه اللى جت لك مفيهاش الا 3 كليات ع مستوي الجمهوريه وانت عاوز تجرب حظك تقدر تعمل ده وانت وحظك اهو كده كده الكليات كلها برا محافظتك ، انت لك فرصه ف التحويل واحده متضيعهاش ف حاجه هتترفض مقدما .

◘ النوع الرابع وهو تحويلات المعاهد تقدر تحول لاي معهد في ضوء القواعد حسب هل بيقبل اقليمي ولا جغرافي بشرط جايب درجته وحسب النسبه المسموحه .

◘ لا يوجد تحويل من ( أ ) الى ( أ ) مناظر ولكن يوجد غير مناظر عموما بردو ابقي جرب .

◘ التحويل هو مرة واحده يا صابت يا خابت .

- يتم التحويل للبرامج الجديدة بكليات الجامعات المصرية عن طريق الجامعات مباشرة وفى حدود الحد الأدنى للقطاع.

- يكون التحويل بسبب النقل الإداري عن طريق الجامعة مباشرة وبشرط موافقة الجامعة والكلية المعنية بالتحويل إليها.

- يكون التحويل بسبب الحالات المرضية عن طريق الجامعات مباشرة تطبيقاً للمادة (86) من اللائحة التنفيذية لقانون تنظيم الجامعات.

تعتبركلية التخطيط العمرانى بالقاهرة من الكليات الفريدة وليس لها مناظر، والتحويل منها أو إليها يخضع لنظام التحويل لكليات غير مناظرة .

اعتبار كليات الهندسة الالكترونية بمنوف جامعة المنوفية وهندسة البترول والتعدين بالسويس جامعة السويس وهندسة الطاقة باسوان جامعة اسوان مناظره لباقى كليات الهندسة للجامعات المصرية الاخرى فقط للطلاب المستجدين والمرشحين للفرقة الاعدادية ويتم القبول بها خارج التوزيع الجغرافى والاقليمى ويتم التحويل منها او العكس طبقا لقواعد التحويل المناظر .

اعتبار كلية الطب بالاسماعيلية جامعة قناة السويس مناظرة لباقى كليات الطب بالجامعات المصرية ويتم القبول بها فقا لقواعد التوزيع الجغرافى ويتم التحويل منها او اليها لكليات الطب بالجامعات .

طلاب مركز ميت غمر التابع لمحافظة الدقهلية يتم تحويلهم إلي كليات جامعة الزقازيق كمنطقة جغرافية (أ) بالنسبة لهم.

لينك التحويلات اضغط هنا